General

هو إيه الفرق بين Delay و Latency و Jitter؟وإمتى كل واحدة منهم بتأثر على جودة الشبكة الفعلية؟ المصطلحات دي ناس كتير بتخلط بينها…مع إن كل واحد له معنى مختلف تمامًا،وبيأثر على تجربة المستخدم بطريقة غير التانية. أولاً: Latencyده الوقت اللي الباكت بتاخده عشان تتحرك من نقطة لنقطة.يعني:من أول ما تبعت الطلب…لحد أول بايت يوصل. مثال:Ping = 30 msده Latency. هي أهم مقياس لأي تطبيق لحظي زي:• الألعاب• المكالمات• الفيديو• XR والـ 6G Use Cases كل ما الـ Latency تقل… التجربة تبقى أنعم. ثانيًا: Delayده مصطلح عام يشمل أي نوع من أنواع التأخير في الشبكة.ممكن يكون:• Processing Delay• Transmission Delay• Queuing Delay• Propagation Delay يعني الـ Latency جزء من الـ Delay،لكن الـ Delay نفسه أوسع وأشمل. لو عندك ازدحام في الـ Router… ده Delay.لو المسافة كبيرة جدًا… برضه Delay.لو الـ Packet بتتقعد في Buffer… ده Queuing Delay. ثالثًا: Jitterده بقى “اختلاف الـ Delay من باكت للتانية”.يعني لو أول باكت وصلت بعد 20 msواللي بعدها وصلت بعد 35 msواللي بعدها 25 ms…يبقى عندك Jitter عالي. المشكلة مش في التأخير نفسه…المشكلة إنه مش ثابت. Jitter بيبوّظ:• مكالمات VoIP• Video streaming• Gaming• أي حاجة Real-time لأن الصوت أو الصورة محتاجة وصول ثابت ومنتظم للباكتس. الزتونة:• Latency: الوقت اللي الباكت بتاخده عشان توصل.• Delay: أي نوع من أنواع التأخير في الشبكة.• Jitter: عدم انتظام التأخير من باكت للتانية. Latency = إحساس البطءJitter = إحساس التقطيعDelay = السبب الأساسي اللي عمل الاتنين والشبكة القوية هي اللي تقدر تتحكم في الـ 3… مش في واحد بس. #Latency#Jitter#Delay#Networking#Transmission#WaleedElsafoury#وليد_الصافوري

ليه مهندس شبكات الموبايل محتاج يتعلم برمجة؟! أيوه… انت مهندس اتصالات، شغال في الـ RF، أو بتفهم في الـ Core، أو عاشق للـ Protocols،بس تيجي عند البرمجة وتقول: “مش تخصصي يا معلم!” اسمحلي أقولك… لأ، البرمجة جزء مهم من شغلك ومستقبلك، خاصة في شبكات الموبايل اللي ماشية بسرعة ناحية الـ Automation، والـ Virtualization، والـ AI. فين بنحتاج البرمجة؟ 1. Automation & Scripting:بدل ما تعمل config أو monitoring يدوي على عشرات النودز، تقدر تكتب سكريبت بلغة Python أو Bash يخلصهولك في ثانية. 2. Data Analysis & Log Parsing:تحليل لوجات الـ signaling، أو KPIs الشبكة، بيكون أسهل جدًا ببايثون ومكتباتها (Pandas, Regex, matplotlib). 3. API Integration:شبكات 5G Core بقت كلها REST APIsلازم تعرف إزاي تبعت requests، تتعامل مع JSON، وتعمل automation للكلام ده. 4. Simulation & Modeling:عايز تحاكي شبكة، ترسم traffic model، أو تعمل اختبارات على Mobility؟البرمجة هتساعدك تحقق ده بسهولة، خصوصًا باستخدام أدوات زي ns-3 أو Python-based tools. 5. AI/ML in Networks:بتحلل network behavior، تتنبأ بـ congestions، تعمل traffic prediction؟هتدخل في Machine Learning… وده مش هيشتغل من غير شوية كود. طيب أبدأ بإيه؟ بايثون (Python): صديقك الأول. سهل، واسع الاستخدام، ومدعوم في كل حاجة من Network Automation لـ Data Science. Shell Scripting: مفيد جدًا في البيئات اللي فيها Linux (وده واقع في كل الشبكات الحديثة). SQL: لو هتتعامل مع قواعد بيانات الشبكة أو تحلل performance data. نتعلم منها إيه؟ ازاي تكتب سكريبت يحللك مشكلة حقيقية تفهم الـ API calls وتتعامل مع الـ JSON تعمل parsing لأي لوج أو PCAP تبدأ تبني automation tool بسيط وتطوره تشوف الشبكة بمنظور الـ DevOps… مش مجرد CLI الزتونة: البرمجة مش “رفاهية” لمهندس الشبكات…دي بقت أداة بقاء وتفوق.ومهندس الاتصالات الشاطر هو اللي بيعرف يجمع بين الـ signaling والـ scripting، بين الـ RF tools والـ Python scripts. ابدأ حتى بسطر كود في اليوم… وبكرة هتشكر نفسك. #WaleedElsafoury#وليد_الصافوري

للناس اللي عايز تشتغل Security في شبكات الموبايل؟ خريطة الطريق كما طلبتم لو أنت من الناس اللي بتحب الشبكات بس عندك هوس بالسيكيورتي… بتحب تفتّش، تحلل، تلاقي الثغرة، وتقفلها باحتراف…يبقى المجال ده معمول علشانك: Mobile Network Security بس عشان تبقى فعلاً مهندس أو متخصص أمن في شبكات الموبايل، الطريق محتاج خطوات واضحة، وفهم عميق مش بس للبروتوكولات، لكن كمان للتهديدات اللي بتستهدفها. أولاً: افهم الشبكة كويس الأول مش هتعرف تؤمن حاجة انت مش فاهمها. فابدأ بـ: فهم بنية الشبكة: 2G, 3G, 4G, 5G (وخصوصًا 4G EPC و5G Core) البروتوكولات الأساسية: GTP, Diameter, SIP, HTTP/2, SCTP مكونات الشبكة: MME, HSS, eNodeB, AMF, SMF, UPF… ثانيًا: افهم السيكيورتي جوه الشبكة Authentication & Key Exchange (مثل AKA) أنواع الهجمات المحتملة: IMSI Catching Signaling Storm GTP Injection Session Hijacking Encryption Algorithms: MILENAGE, SNOW 3G, ZUC ثالثًا: اتعلم Tools & Monitoring Wireshark (لتفسير الـ signaling والـ attacks) S1/X2/Gn/SGi interface analysis Threat Intelligence Tools سيستمز المراقبة زي IDS/IPS، وخصوصًا للـ telecom traffic رابعًا: خش في السيكيورتي الأوسع مفاهيم Cybersecurity العامة: CIA Triad (Confidentiality, Integrity, Availability) Risk Assessment Firewall, VPN, IDS, IPS شهادات مفيدة جدًا: Security+: كبداية CEH: للهاكر الأخلاقي 5G Security from GSMA or Coursera/Udemy ممكن كمان تبص على CISSP لو ناوي senior level خامسًا: جرب بنفسك! اشتغل على simulations أو labs بـ Open5GS أو srsRAN جرب أدوات زي srsUE وتابع الـ signaling بنفسك اقرأ تقارير الثغرات الأمنية من 3GPP وGSMA الزتونة: لو عايز تبقى Mobile Network Security Expert، فكر نفسك بمحقق بيشتغل في مدينة متقسمة zones (RAN, Core, IMS…)، وكل zone فيها ثغرات ومشاكل.مهمتك؟ تكتشفها، تفهمها، وتقفلها قبل ما حد يستغلها. ابدأ من النهارده، ولو حتى بإنك تفتح Wireshark وتشوف UE Attach بتتم إزاي. #WaleedElsafoury#وليد_الصافوري

لو عندك امتحانات ودماغك مش راضية تشتغل… تعالى هنا شوية! الامتحانات قربت؟ والمذاكرة عاملة زي صديقك اللي مطنشه دايما بس من الأخر ملكمش غير بعض…. متقلقش… جايبلك شوية نصائح كده على الماشي، تساعدك تذاكر صح، تفتكر أسرع، وتنظم وقتك من غير ما تحس إنك في ماراثون: 1. ذاكر بذكاء مش بكمية:بدل ما تقعد 5 ساعات قدام الكتاب بتسرح وبتعدّ البلاط… ذاكر ساعة بتركيز، وريح 10 دقايق وارجع ذاكر ساعة وريح 10 دقايق وهكذا. اسمها Pomodoro technique، وفعالة جدًا للتركيز. 2. حرك مخك بمذاكرة نشطة:اسأل نفسك أسئلة، ارسم مخططات، أو اشرح الموضوع لصاحبك… دي حاجات بتقوي الذاكرة أكتر من الحفظ الصامت. 3. نام بضمير:أيوه والله! النوم الكويس مش رفاهية، ده بيخزن المعلومات في الذاكرة. نام 7 لـ 8 ساعات وخلّي دماغك تشتغل وانت نايم. 4. خليك صاحي بالأكل الصحي:ابعد عن الزيوت والمقليات وقت المذاكرة هتقل جسم وتحسسك بالخمول… وكل حاجات بتنشّط الدماغ زي المكسرات، الشوكولاتة الداكنة، والتونة. 5. جدولك هو صاحبك:نظم يومك بورقة وقلم أو أبلكيشن… حدد كل يوم هتذاكر فيه إيه، ومتنساش تحط وقت للراحة والخروجة… آه والله، الخروجة مهمة! بس خروجة خفيفة مش اربع ايام تلت ليالي. 6. قلل توتر الامتحانات:التوتر مش هينقذك، العكس تمامًا. جرّب تتنفس ببطء، مارس رياضة خفيفة، وافتكر إن ربنا مش بيضيع تعب حد. 7. أدعي كتير في صلاتك أن ربنا يرزقك الفهم والتفوق وتتوفق في الأمتحانات وفي حياتك. الزتونة:المذاكرة مش شبح… بس محتاجة شوية نظام، نوم، وتكنيكات ذكية. خليك هادي، حضر خطتك، وابدأ دلوقتي… وكل نجاح وإنت طيب!#WaleedElsafoury#وليد_الصافوري#الزتونة

داخل على امتحان؟ خد بالك من دول! الامتحان مش بس ورقة وقلم، ده معركة نفسية كمان! عشان كده، جبتلك شوية نصائح كده من القلب للقلب، قبل وأثناء الامتحان: قبل دخول الامتحان: نام كويس. بلاش تدخل الامتحان وانت شايف السؤال بيتكلم معاك! راجع قبل دخول اللجنة بسرعة كأنك بتقرأ قصة، مش تحفظ كتاب تاريخ. ركّز على العناوين، المفاتيح، واللي كنت بتنساه دايمًا. ابعد عن أصحابك اللي بيقولوا “مذاكرتش حاجة خالص” وهوبا تلاقيه مقفل الأمتحان! حضّر أدواتك الليلة اللي قبلها (أقلام، آلة حاسبة، بطاقة)، بلاش تصحى الصبح تعمل treasure hunt. وأثناء الامتحان: اقرا الأسئلة بهدوء، ما تتحمسش وتجاوب سؤال غير اللي مقصود. لو نسيت إجابة، خليك هادي. المخ زي الواي فاي، بيشتغل أبطأ تحت الضغط! جاوب السهل الأول، واركن الصعب. ده مش تحدي شطرنج. راجع إجاباتك لو فيه وقت. أوقات الغلط بيكون في تسرع مش في المعلومة. وإياك ثم إياك تسيب سؤال فاضي… حتى لو هتكتب “أنا حاولت”. الزتونة: الامتحان محطة مش نهاية العالم. خليك رايق، وادخل بثقة، وافتكر إنك أذكى من ورقة أسئلة!#وليد_الصافوري#WaleedElsafoury#الزتونة

لو نفسك تتعلم برمجة ومحتار تبدأ بأنهي لغة، تعالى نفكك الحكاية ببساطة! البرمجة عاملة زي العربيات… كل لغة لها “موتور” وطريقة تشغيل ومجال بتبدع فيه. تعالوا نفهم سوا الفرق بين أشهر لغات البرمجة، وإمتى تستخدم كل واحدة فيهم: Python أشهر واحدة دلوقتي تقريبا بسيطة وسهلة في الكتابة والقراءة. تستخدم في:تحليل البيانات والـ Data Scienceالذكاء الاصطناعي والـ Machine Learningبرمجة السكربتات وأتمتة المهامالويب (مع Django/Flask) أنسب اختيار لو لسه بادئ ومحتاج لغة مرنة وسهلة. Java قوية جدًا وبتشتغل في أي مكان تقريبا تستخدم في:تطبيقات الأندرويدالأنظمة البنكية والضخمةالـ Backend للويب (Spring)تطبيقات سطح المكتب لو ناوي تشتغل في شركات كبيرة أو في تطوير Android C / C++ لغات قديمة بس تقيلة. قريبة من الهاردوير وسريعة جدا تستخدم في:أنظمة التشغيلالألعاب القويةالميكروكنترولرزالشبكات وبرامج الحماية لو شغلك قريب من العتاد أو الأداء مهم جدا JavaScript لغة الويب الأولى بلا منازع! تشتغل في:تصميم المواقع التفاعلية (Front-end)سيرفرات الويب (Node.js)تطبيقات الموبايل (React Native) لو عايز تبقى Web Developer أو تبني مواقع وتطبيقات. SQL مش لغة برمجة تقليدية، بس أساسية. تشتغل على قواعد البيانات. تستخدم في:إدارة واستعلام البياناتتحليل البيانات أي مبرمج أو Data Analyst لازم يعدي عليها. PHP لسه ليها وجود في الويب. بتستخدم في:مواقع زي WordPressالـ Backend لبعض المواقع لو بتشتغل على مواقع جاهزة أو أنظمة CMS. الزتونة: لسه بادئ؟ ابدأ بـ Python، هتخليك تمشي في كذا سكة. عايز تدخل في عالم الويب؟ اتعلم HTML + CSS + JavaScript. بتفكر في أندرويد؟ روح على Java أو Kotlin. نفسك تبني ألعاب أو تشتغل في الروبوتات؟ جرب C++. لو بتدور على فلوس كتير في وقت قليل؟ شوف إيه المطلوب في السوق، وابدأ منه!#WaleedElsafoury#وليد_الصافوري