ستاندر ألوان كابلات الفايبر – ليه في كابل فايبر بيشبه علبة فلوماستر؟
لو فتحت كابل فايبر داخله 12 أو 24 كور، هتلاقي الدنيا مولعة ألوان: أزرق، برتقالي، أخضر، بني… لدرجة إنك هتفتكر إنك داخل على حصة رسم مش شغل فايبر!
بس الحقيقة إن الألوان دي مش ديكور، دي ستاندر عالمي هدفه التنظيم وتسهيل التوصيل والفحص والصيانة. تخيل توصل 96 كور فايبر من غير ما يكون فيه ترتيب ألوان؟
الستاندر الرسمي؟ ANSI/TIA-598-C
الستاندر ده بيحدد ترتيب الألوان للكورز (الألياف) جوا الكابل، والتكرار بيكون كل 12 لون. الترتيب كالتالي:
1. أزرق Blue
2. برتقالي Orange
3. أخضر Green
4. بني Brown
5. رمادي Slate
6. أبيض White
7. أحمر Red
8. أسود Black
9. أصفر Yellow
10. بنفسجي Violet
11. وردي Rose
12. فيروزي Aqua
لو الكابل فيه أكتر من 12 كور؟ تبدأ المجموعة التانية بنفس الترتيب بس بماركر معين أو بلافة خارجية (Binder) بتوضح المجموعة.
طب وفايدة الترتيب ده؟
أثناء اللحام (splicing)، الفني يعرف يوصل أنهي كور مع أنهي كور.
أثناء الفحص، تقدر تحدد العطل في أنهي كور بسرعة.
في التوسعات والصيانة، توفر وقت ومجهود كبير.
الزتونة؟
ألوان كابلات الفايبر مش شغل أطفال، دي لغة تقنية متفق عليها عالميًا علشان الدنيا ما تبقاش كركبة في كركبة. واحفظ الترتيب كويس، لأنه هيكون صاحبك في أي مشروع فايبر، من أول الباتش كورد لحد الراوتر الكبير في السنترال!
#WaleedElsafoury#وليد_الصافوري