لو عندك أكتر من موقع وعايز توصلهم ببعض… تستخدم إيه؟!
سواء شغال في شركة تليكوم، IT، أو حتى شركة عندها فروع كتير وعايزة تربطهم ببعض بشبكة داخلية (VPN)، لازم تفهم إمتى تستخدم كل وسيلة ربط. وخليني أبسطهالك خالص
الفايبر – Fiber Optics
ده لو انت في منطقة متحضرة وفيه بنية تحتية محترمة…
أسرع، أكتر أمان، وبيديك استقرار عالي جدًا.
مشكلته إنه غالي في التمديد، ومش متاح في كل حتة.
استخدمه لما يكون عندك مواقع ثابتة، في مناطق فيها كابلات فايبر، وعايز سرعة وثبات يشرفوك
الميكروويف – Microwave Links
ده لو عندك Line of Sight (يعني المكانين شايفين بعض من غير عوائق)
ممتاز للمسافات المتوسطة، سهل التركيب، أسرع من الانتظار لمد الفايبر.
بيتأثر بالطقس شوية، والمباني الطويلة ممكن تعترض الإشارة.
استخدمه لما الفايبر مش متاح، والموقعين قريبين (حدود 30-40 كم)، وفيه رؤية مباشرة بينهم.
الستلايت – Satellite
ده آخر أداة في شنطة الشبكات، نستخدمه لما “مفيش أمل”
بيشتغل في أي مكان على الكوكب، حتى لو فوق جبل أو في الصحراء.
بطيء، الـ latency عالي جدًا (خاصة في الأقمار الجيو-ثابتة)، وغالي.
استخدمه في المواقع النائية جدًا، اللي لا فايبر هيوصلها ولا ميكروويف هينفع.
الموبايل – 4G/5G Routers
حل سريع وسهل لو عندك موقع مؤقت، أو لسه بتجهز البنية التحتية.
Plug and play، مفيش تمديدات ولا تجهيزات.
مش ثابت، السرعة والـ latency بيعتمدوا على التغطية وجودة الشبكة.
استخدمه (Backup) أو حل مؤقت لحد ما توصل الفايبر أو تركب المايكروويف.
الزتونة؟
فايبر لو متاح = الحل الأول.
ميكروويف = بديل ممتاز في المسافات المتوسطة.
ستلايت = للمواقع النائية جدًا.
موبايل = حل سريع ومؤقت، أو كباكب.
#WaleedElsafoury#وليد_الصافوري