يعني إيه Band Refarming؟
وليه شركات المحمول بتعمله؟
وإيه أهم القواعد اللي لازم تتراعى أثناء تنفيذه؟
واحدة من أشهر الكلمات اللي هتسمعها في عالم الـ Mobile Networks هي:
Refarming
خصوصًا مع دخول 4G وبعدها 5G.
يعني إيه Band Refarming؟
ببساطة
هو إعادة استخدام نفس الترددات القديمة لتشغيل تكنولوجيا أحدث.
يعني بدل ما جزء من الباند شغال 2G أو 3G
أقوم أحوله إلى:
• 4G LTE أو • 5G NR
من غير ما أشتري Spectrum جديد.
مثال عملي
زمان Band 1800 MHz
كان شغال بالكامل GSM.
بعد انتشار 4G
المشغل بدأ ياخد جزء من الباند ويشغله LTE.
ثم لاحقًا ممكن ياخد جزء إضافي ويخصصه للـ 5G.
وده يعتبر Refarming.
طيب ليه احتجناه؟
لأن الـ Spectrum مورد محدود جدًا
وشركات الاتصالات دفعت فيه مليارات.
فبدل شراء ترددات جديدة باستمرار
بنستغل الترددات الموجودة بطريقة أكثر كفاءة.
إيه الفائدة؟
1. زيادة الـ Capacity
تقنيات 4G و5G أكفأ بكثير من 2G و3G.
يعني نفس الـ MHz يخدم عدد مستخدمين أكبر.
2. زيادة السرعات
LTE و NR بيطلعوا Throughput أعلى بفرق كبير.
3. استغلال أفضل للـ Spectrum
بدل باند مستخدم بشكل ضعيف يتم استغلاله بشكل أفضل.
4. دعم توسعات 5G
بدون الحاجة دائمًا لشراء ترددات إضافية.
إيه أشهر الباندات اللي حصل لها Refarming؟
عالميًا:
• 900 MHz • 1800 MHz • 2100 MHz
بدأت مع 2G أو 3G
ثم انتقلت تدريجيًا لـ LTE وفي بعض الدول لـ 5G.
هل الموضوع سهل؟
لا طبعًا
لأنك لازم تحافظ على المشتركين الحاليين.
مينفعش تصحي الصبح وتقفل نصف شبكة الـ GSM مرة واحدة.
أهم قواعد الـ Refarming
1. دراسة عدد المستخدمين
لازم تعرف:
كام مستخدم مازال يعتمد على التكنولوجيا القديمة.
2. الحفاظ على Coverage
بعض الترددات المنخفضة مهمة جدًا للتغطية.
فلازم يتم النقل بحذر.
3. التدرج في التنفيذ
Refarming غالبًا بيتم على مراحل.
مش دفعة واحدة.
4. مراقبة الـ KPIs
قبل وبعد التنفيذ.
زي:
• Accessibility • Retainability • Throughput • Handover
5. التأكد من دعم الأجهزة
لازم أغلب الأجهزة تدعم التكنولوجيا الجديدة على نفس الباند.
معلومة مهمة جدًا
من الأسباب الرئيسية اللي خلت LTE ينجح بسرعة
إنه كان قادر يشتغل على أحجام مختلفة من الـ Channel Bandwidth:
1.4 MHz 3 MHz 5 MHz 10 MHz 15 MHz 20 MHz
وده سهل جدًا عملية الـ Refarming.
لأن المشغل يقدر يخصص أي جزء متاح من الباند بدون الحاجة لامتلاك Spectrum ضخم من البداية.
وماذا عن 5G؟
الـ Refarming أصبح أكثر أهمية.
لأن كثير من المشغلين بيشغلوا 5G على باندات كانت أصلًا:
2G أو 3G أو 4G
بعد إعادة توزيع الموارد.
الزتونة:
Band Refarming مش معناه إضافة ترددات جديدة.
هو ببساطة:
“إعادة توزيع نفس الـ Spectrum على التكنولوجيا اللي تحقق أعلى كفاءة.”
وده واحد من أهم الأسباب اللي سمحت لشبكات 4G و5G بالانتشار السريع بدون الحاجة إلى Spectrum جديد في كل مرة.
#Refarming#5G#LTE#Spectrum#RF#MobileNetworks#Telecom#WaleedElsafoury#وليد_الصافوري#الزتونة